BOL
By Faiz Ahmad Faiz
Bol ke lab aazaad haiN teray
bol zabaaN ab tak teri hai
tera sutwaaN jism hai tera
bol ke jaaN ab tak teri hai
dekh ke aahan gar ki dukaaN maiN
tund haiN sholay, surkh hai aahan
khulnay lagay qufloN ke dahaanay
phaila har ek zanjir ka daaman
bol, yeh thoRa waqt bohat hai
jism-o-zabaaN ki maut se pehlay
bol, ke sach zinda hai ab tak
bol, jo kuchh kahna hai kah lay